गजल

अहाँ कखनो तs बाट हमर घरक धरबै ,,
हमरा संगे-संगे अहूँ एक्के सड़क धरबै ,

भाग्य मे जे लिखल अछि तें विरह मे मरै छी ,
आशा केने छी कहियो तs मान नोरक धरबै ,

राहू-केतू केने अन्हरीया ताशक सियाह छी ,
हेतै जँ तेज मंगल तs ध्यान भोरक धरबै ,

काँट कलपाबैए कने काल कनेक दर्द दs ,
फुलो भेटबे करत , बाट नै ने डरक धरबै ,

सिनेह जँ हारत तs समझू दुनियाँ डोलत ,
लड़ाइ जीत, कहियो तs झण्डा प्यारक धरबै ,

ठार दलान पर स्वागतक थारी सजेने छी ,
माँग हमर राँगल हाथ सेनुरक धरबै ,

नै मागै छी अकाशक लाख तरेगण हम यौ ,
"अमित" कहियो तs गजल हजारक धरबै . . . । ।

अमित मिश्र