‎[{ होली गीत }]

होली एलै जोगीरा गयबाक मोन होइ यै .

मस्त धुन पर नचबाक मोन होइ यै ,

जाइ छी होली गीतक सीडी किनै लए ,

शहर मे रहि गामक यादि किनै लए ,

हौ भाइ ,घुमि एलौँ पुरा बजार ,

कत्तौ नै भेटल परंपरागत गीतक भंडार ,

नै भेटल "शिव मठ पर लाल धुजा"

नै भेटल "आजु जनकपुर होरी रे रसिया"

खुब बिकै छै द्विअर्थी अश्लील गीत ,

छिनरपन कए बान्ह तोड़ै छै नव गीत .

जीजा-शाली , देवर-भौजी कए बेपर्द गीत ,

लाज लागै यै कहैत , कत्त-कत्त रंग लागाबैए नव गीत ,

होली रातिक खेल बुझू सब पागल भ गेलै ,

माँ-बाप कए सामने छौड़ा दारू-भांग हवश कए प्यासल भ गेलै ,

नहि जी सकै छी होली मे पुरान लोक आब ,

आँखि-कान मुनि लिअ पुरान लोक आब .

हमहूँ जाइ छी कोठी कोन मे नुका सुतै लए ,

अपन कविता कए इज्जत बचबै लए . . . । ।

अमित मिश्र