ई संसार अछि खाली बसेरा बुझि क आयब भाइ
लेलहुँ जन्म जगमे एक दिन सभ छोरि जायब भाइ
साँसक डोर टूटत दूर तखने सभ भ जायत भाइ
माटिक मूरती ई देह सुख कोना क पायब भाइ
हरिकेँ नाम जगमे जे भजत फल ओ तँ पायत भाइ
धन-बल मोहमे जीवन कते आरो गमायब भाइ
जायत संग कृत टा तुच्छ बाँकी सभ कहायत भाइ
काल्हिक अछि ककर जगमे भरोसा की बसायब भाइ
सत अछि ‘मनु’ कहै जगमे कतय हरि छोरि जायब भाइ
माया सभसँ रहि बड़ दूर हरि-हरि मनसँ गायब भाइ
(बहरे रूप, मात्राक्रम 2221-2221-2221-2221)
✍🏻 जगदानन्द झा ‘मनु’
सजल कन्हाइ रूपक रस बहाबैए
हरिक ई रूप दुनियाकेँ रिझाबैए
मुकुटपर पैंख मोरक मोहनी सोहै
हियामे रस सिनेहक ई जगाबैए
जखन बाजै मधुर मुरली मुरारीकेँ
तखन ई संग राधाकेँ नचाबैए
सलोना श्याम हे चितचोर मोहन छी
करेजक चैन ई गोपिक चुराबैए
मनोहर रूप ‘मनु’ ई देख कान्हाकेँ
चरणमे शीश अप्पन आ झुकाबैए
(बहरे हजज, मात्राक्रम 1222-1222-1222)
✍🏻 जगदानन्द झा ‘मनु’
बड़ सुनल जस माइ हे तोहर दुअरिया
जोड़ि कल अनलौं सिनेहक हम गठरिया
सूप डाला कोनिया सभमे अरज छै
थाढ़ दुखलै गोरबा फेरूँ नजरिया
दुख दुखीयाकेँ हरै परमेश्वरी तूँ
माइ हमरे बेरिया मुनलअ किबरिया
दिन छये देने छलौं शोभा अपन जे
फेर दर्शन दिअ अहाँ हम छी भिखरिया
मोन टूटल जाइए छल देह टूटल
‘मनु’ तकै छै माइकेँ सगरो नगरिया
(बहरे रमल, मात्राक्रम 2122-2122-2122)
✍🏻 जगदानन्द झा ‘मनु’
चलू देखब हे बहीना शिवकेँ
अपन गौरीकेँ सजनमा शिवकेँ
सभक ई खाली भरै छथि झोली
सरण आइब जे सुमरला शिवकेँ
गरीबोकेँ छथि इहे सुननाहर
दियौ जल भरि एक लोटा शिवकेँ
मनुख दानव देव आ प्रेतात्मा
सगर दुनिया मिल मनेला शिवकेँ
सिया रामोकृष्ण हुनके पुजलनि
बनेलनि सगरो अराध्या शिवकेँ
कृपानिधि कैलाशवासी जय भव
चरण वंदन जग रचैता शिवकेँ
मनोरथ सब पूर्ण करता शम्भू
कहल ‘मनु’ जे मनसँ भजता शिवकेँ
(मात्राक्रम- 1222-2/ 1222-2)
सुझाव, मार्गदर्शन व आलोचना सादर आमंत्रित अछि।
✍🏻 जगदानन्द झा ‘मनु’
भगवती जकर माए ओ टुगर रहल कोना
हाथ छै दुनू भेटल रंक ओ कहल कोना
माथ पर हमर सदिखन हाथ माय छथि रखने
एहिठाम रहलै कोनो कठिन टहल कोना
लेब छोरि जीवन देबाक गप्प जे सोचत
संग-संग ओकर सुख शांति नहि बहल कोना
शेरकेँ घरे बैसल नहि शिकार भेटै छै
घरसँ जे निकलबै नहि घर बनत महल कोना
काज नहि अपन हिस्सा केर ‘मनु’ करी हम सब
ई सहज सगर दुनिया नहि बनत जहल कोना
(मात्राक्रम 212-1222 /212-1222, सभ पाँतिमे)
✍🏻 जगदानन्द झा ‘मनु’
मैया हमर जगतारनि कल्याणी
सबहक अहाँ सुधि लेलौं महरानी
नै हम मिलब माँ बाटक गरदामे
चिंता किए जेकर माय भवानी
जग ठोकरेलक सदिखन ढेपासन
देलौं शरण निर्बलके हे दानी
दर्शन अपन दिअ हे अम्बे माता
नै सोन झूठक चाही नै चानी
धेलक चरण 'मनु' तोहर हे मैया
नै आब जगमे ककरो हम जानी
(मात्रा क्रम : २२१२-२२२-२२२)
जगदानन्द झा 'मनु'
हम्मर अँगना मैया एली
गमकै चहुदिस अड़हुल बेली
धन हम छी धन हम्मर अँगना
मैया जतए दर्शन देली
आबू बहिना संगी हम्मर
मैया संगे सामाँ खेली
जे किछु अछि एखन हमरा लऽग
ओ सबटा मैया दय गेली
बड़ भागसँ ‘मनु’ भेटल अवसर
मैया हमरो सेबा लेली
(मात्राक्रम, सब पाँतिमे आठ-आठटा दीर्घ)
✍🏻 जगदानन्द झा ‘मनु’
