एकटा मैथिली जमेएकें उत्तर

मिथिलामे जमेएकें भोजन परसैत काल साउस पुछलथिन : "झा जी खीर खेबइ कि हलुआ..??"

जमेए : "किएक घरमे कटोरी एक्के टा छैक की ?''

गजल

अहाँ रहूँ घरे हम   ठानि अबै छी

एहि पापी पेट लेल छानि अबै छी

रोटी पर नून नै घी पीबि सपना 
हुनक भोजक मंत्र जानि अबै छी 

कमौआ पुतक लातो सोहनगर 
गरीब घरक कोड़ो गानि अबै छी 

चानि पर तेलक अभाबे केश नै
कनियाँगतक खेत फानि अबै छी 

गप्पक कोनो खतिहान नै भेलैए
'मनु' बैसू हम पीबि पानि अबे छी

(सरल वार्णिक बहर - वर्ण १३)

जगदानन्द झा 'मनु'

भक्ति गजल

मैया हमर जगतारनि कल्याणी 

सबहक अहाँ सुधि लेलौं महरानी 

नै हम मिलब माँ बाटक गरदामे

चिंता किए जेकर माय भवानी  

जग ठोकरेलक सदिखन ढेपासन 

देलौं शरण निर्बलके हे दानी

दर्शन अपन दिअ हे अम्बे माता 

नै सोन झूठक चाही नै चानी

धेलक चरण 'मनु' तोहर हे मैया 

नै आब जगमे ककरो हम जानी 

(मात्रा क्रम : २२१२-२२२-२२२)

जगदानन्द झा 'मनु'