गालपर तिलबा कते शान मारैए
निकलु नै बाहर सभक जान मारैए
देखलौं जतए अहीँपर सभक फोकस
सभ तरे तर नजरिकेँ बाण मारैए
तिर्थमे पंडित तँ मुल्ला मदीनामे
सभ अहीँकेँ राति दिन तान मारैए
आइ सुन्नरि मोहमे बूढ़ नव डूबल
देखिते मुँह फारि मुस्कान मारैए
काज कोनो नै बनेए जँ जीवनमे
‘मनु’ अहीँ लग फूल आ पान मारैए
(बहरे कलीब, मात्राक्रम 2122- 2122-1222)
✍🏻 जगदानन्द झा ‘मनु’
अहाँ बिनु नै सुतै नै जागैत छी हम
कही की राति कोना काटैत छी हम
सिनेहक मोल नै बुझलहुँ संग रहितो
परोक्षमे कते छुपि कानैत छी हम
करेजा केर भीतर छबि दाबि रखने
अहीँकेँ प्राण अप्पन मानैत छी हम
बुझू नै हम खिलाड़ी एतेक कचिया
अहाँ जीती सखी तेँ हारैत छी हम
अहाँ जतए कतौ जगमे खुश रही ‘मनु’
इहे वरदान सदिखन माँगैत छी हम
(बहरे करीब, मात्राक्रम 1222-1222-2122)
✍🏻 जगदानन्द झा ‘मनु’
कुटीमे आइ साँवरिया आबि गेलै
करेजक तार सभ सोहर गाबि गेलै
पिया बुझिते हमर मोनक दर्द कनिको
कतेको दुख अपन हँसिते दाबि गेलै
हुनक मुस्कीसँ सगरो दुनियाक सम्पति
हृदय सबटा हमर छनमे पाबि गेलै
बनेलहुँ हम अपन जे हुनका सजनमा
जिला भरि केर लोकक मुँह बाबि गेलै
बसल छल मोन मंदिरमे ‘मनु’ जिनक छबि
हुनक हियकेँ हमर विनती भाबि गेलै
(बहरे करीब, मात्राक्रम 1222-1222-2122)
👍🏻 जगदानन्द झा ‘मनु’
