भगवती जकर माए ओ टुगर कहल कोना
हाथ छै दुनू भेटल रंक ओ रहल कोना
माथ पर हमर सदिखन जखन हाथ मैयाकेँ
एहिठाम रहलै कोनो कठिन टहल कोना
लेब छोरि कखनो देबाक बात कनि सोचू
सगर गाम देखू सुख शांति नहि बहल कोना
शेरकेँ घरे बैसल नहि शिकार भेटै छै
घरसँ जे निकलबै नहि घर बनत महल कोना
काज नहि अपन हिस्सा केर ‘मनु’ करी हम सब
ई सहज सगर दुनिया नहि बनत जहल कोना
(मात्राक्रम : 212-1222/ 212-1222 सभ पाँतिमे)
✍🏻 जगदानन्द झा ‘मनु’
नेह पजाड़ल अहाँक धधैक रहल अछि
एसगर करेज हमर तड़ैप रहल अछि
कोन लगने अहाँसँ ‘मनु’ नेह लगेलौं
प्रेमक गरमीसँ देह बरैक रहल अछि
© जगदानन्द झा ‘मनु’
घुमि अहाँ कनखीसँ कनि जे ताकि देलहुँ
अपन तन मन एहि पर हम हारि देलहुँ
आब नहि बैकुंठकेँ रहि गेल इच्छा
‘मनु’ अहाँके लेल सगरो बारि देलहुँ
© जगदानन्द झा ‘मनु’
धाब जे अहाँ हमर करेजकेँ देलहुँ
ओ सबटा दर्द दुनियाँसँ नुका लेलहुँ
मुस्कीसँ हमर नै बुझू जे हम खुश छी
अहाँक खुशी लेल नोरकेँ पी गेलहुँ
© जगदानन्द झा ‘मनु’
जखन सगरो दर्द भेटल
अपन सीलौं ठोर रेतल
द’बल अपने हाथ गरदनि
तखन के ई नोर मेटल
घरक बन्हन छोरि दुनिया
सटल जतए नोट गेटल
भरोसा करु आब कोना
लखन भेषे चोर फेटल
दहेजक ‘मनु’ चारिचक्का
बियाहक पहिनेसँ सेटल
(बहरे मजरिअ, मात्राक्रम 1222-2122)
जगदानन्द झा ‘मनु’
जखन मोन कानल गजल कहलौं
रहल कोंढ़ छानल गजल कहलौं
जमाना सुतल छल जखन नींदसँ
तहन राति जानल गजल कहलौं
लगन भेल तीसम बरख धरि नहि
पड़ोसनसँ गानल गजल कहलौं
जुआ छल लदल कांहपर लोकक
पसीनासँ सानल गजल कहलौं
उमर ‘मनु’ बितल आर की करबै
अपन मोन ठानल गजल कहलौं
(मात्राक्रम सभ पाँतिमे 122-122-1222)
जगदानन्द झा ‘मनु’
देख तोरा सुन्नरी सीटी बजैए
बन्द धरकन ई कतेकोकेँ करैए
फालतू परमाणु बम दुनिया बनेलक
तोर कनखीपर मनुख लाखो मरैए
© जगदानन्द झा ‘मनु’
हम जरैत छी की अहाँ प्रकाशित रही
अहाँक सुख लेल खुशीसँ हम आँच सही
बातीकेँ जरैत ई दुनिया देखलक
तेल बनि हम तँ जरलौं दुख कतेक कही
© जगदानन्द झा 'मनु'मिथिलामे जमेएकें भोजन परसैत काल साउस पुछलथिन : "झा जी खीर खेबइ कि हलुआ..??"
जमेए : "किएक घरमे कटोरी एक्के टा छैक की ?''
मैया हमर जगतारनि कल्याणी
सबहक अहाँ सुधि लेलौं महरानी
नै हम मिलब माँ बाटक गरदामे
चिंता किए जेकर माय भवानी
जग ठोकरेलक सदिखन ढेपासन
देलौं शरण निर्बलके हे दानी
दर्शन अपन दिअ हे अम्बे माता
नै सोन झूठक चाही नै चानी
धेलक चरण 'मनु' तोहर हे मैया
नै आब जगमे ककरो हम जानी
(मात्रा क्रम : २२१२-२२२-२२२)
जगदानन्द झा 'मनु'
