गजल

एमरीक पूजा जोड़ पकरने छै

गाम गाम मैयाकेँ पसारने छै

एक दोसरामे होड़ छैक लागल

सभक बुद्धिकेँ के आबि जकरने छै

पाठ माइकसँ छकरैत आँखि मुनि सभ

अपन घरक माएकेँ तँ बिसरने छै

एक कोणमे छथि चूप मूर्त मैया

लोक नाच गाजा भाँग दकरने छै

'मनु' किछो जँ बाजल आँखि खोलि कनिको

लोक ओकरेपर गाल छकरने छै

(मात्राक्रम :२१-२१-२२/२१-२१-२२)

© जगदानन्द झा 'मनु'           

गजल

कुटीमे आइ साँवरिया आबि गेलै

करेजक तार सभ सोहर गाबि गेलै

 

पिया बुझिते हमर मोनक दर्द कनिको

कतेको दुख  अपन हँसिते दाबि गेलै

 

हुनक मुस्कीसँ सगरो दुनियाक सम्पति

हृदय सबटा हमर छनमे पाबि गेलै

 

बनेलहुँ हम अपन जे हुनका सजनमा

जिला भरि केर लोकक मुँह बाबि गेलै

 

बसल छल मोन मंदिरमे ‘मनु’ जिनक छबि

हुनक हियकेँ हमर विनती भाबि गेलै

 

(बहरे करीब, मात्राक्रम 1222-1222-2122)

👍🏻 जगदानन्द झा ‘मनु’

अभागल जनता

कोनो मोल नहि सधारण मनुषक जिनगीक
कीड़ा मकोड़ा जेना समा जाइत अछि
अकाल कालके गालमे
बड़का बड़का कहाबे वाला जनसेवक
जनताके बुझैत अछि भेड़ बकड़ी
कटवा दैत अछि अपन कुर्सी खातिर
मृत्यु परल लाशपर सेहो होइत अछि राजनिती
खूब घोषणा होइत अछि क्षतिपूर्तिक हेतु
हर बेर बनैत अछि जाँच आयोग
मुदा परीणाम घासके तीन पात
लाशक मुआवजामे सेहो घूसखोरी
ताहुपर साहबक सिनाजोड़ी
के किछु कहतै ओकरा
ओकरे शाशन ओकरे प्रशाशन
जनसाधारण बहाएत नोर
मुदा "अभागल जनताक" नोरक नहि कोनो मोल !!!!!!!!!!!
               
        :गणेश कुमार झा "बावरा "
          गुवाहाटी