गजल

प्रियतम अहाँक सुधिमे रहनाइ भेल मुश्किल

जीवैत  हम तँ छी नहि मरनाइ भेल मुश्किल

 

की हाल कहु करेजक टुकड़ी हजार भेलै

सभमे अहीँक छवि अछि गननाइ भेल मुश्किल

 

छी नींद चैन सबपर  कब्जा अपन क लेने

कयलौं पिया कि जादू सुतनाइ भेल मुश्किल

 

बड़ मोनकेँ बुझेलौं ई किछु बुझैत नहि अछि
आइब कनी बुझा दिअ बुझनाइ भेल मुश्किल

 

सदिखन ‘मनु’क हृदय मंदिरमे मुरुत अहीँकेँ

बिन पूजने अहाँकेँ  सहनाइ भेल मुश्किल

 

(मात्राक्रम 2212-122 / 2212-122) 

✍🏻 जगदानन्द झा ‘मनु’

गजल

हम अहाँकेँ देखिते सुधि बिसरि गेलौं

लेसने बिन आगि सौंसे पजरि गेलौं 

 

प्राण लेलक आँखि मिलनाइ हरजाइसँ

खा कऽ मोने मोन मुँगबा पसरि गेलौं 

 

अछि जकर मुस्की इजोते सगर चकमक

मोरिते मुँह पानि बिन हम  पिछरि गेलौं 

 

स्वर्ग भेटल ओ अहाँ बिन नरक भेलै 

छोरि सुख बैकुंठकेँ झट ससरि गेलौं

 

देख निरमल नेह हुनकर हृदय गदगद

बुझि सफल ‘मनु’ भेल सपना झहरि गेलौं

 

(बहरे कलीब, मात्राक्रम 2122-2122-1222)

✍🏻 जगदानन्द झा ‘मनु’