नुका कय मुँह अपन सगरो कनै छी हम
विरहकेँ आगिमे सदिखन जरै छी हम
लगा नेहक किए ई आँच चलि गेलौं
करेजक दर्द सहियो नै सकै छी हम
लगन एतेक सतबै छै बुझल नै छल
विछोहे राति दिन घुटि-घुटि मरै छी हम
नजरिमे हम जगतकेँ छी बताहे टा
बुझत की लोक आनंदे रहै छी हम
पिया ओता हमर ई सोचि जीबै छी
लगोने आश ‘मनु’ रस्ता तकै छी हम
(बहरे हजज, मात्रा क्रम : 1222-1222-1222)
✍🏻 जगदानन्द झा ‘मनु’
आबि जायब हमर अंतिम बिदाई पर
फूल दय देब हाथसँ मुँह दिखाई पर
नोर नहि देखलक आँखिक कियो जगमे
नजरि सबहक हमर हाथक मिठाई पर
पोसलौं पेट जीवन भरि कमा हम मरि
घेंट लेलक कटा हँसि ओ फिदाई पर
आइ दिन धरि तँ सब सहिते छलौंहेँ हम
आबि जिद गेल पापीकेँ मिटाई पर
केकरा ‘मनु’ कहत आ के सुनत एतअ
सब हँसै छैक आनक पिटाई पर
(बहरे मुशाकिल, मात्राक्रम - 2122-1222-1222)
✍🏻जगदानन्द झा ‘मनु’
बड़ सुनल जस माइ हे तोहर दुअरिया
जोड़ि कल अनलौं सिनेहक हम गठरिया
सूप डाला कोनिया सभमे अरज छै
थाढ़ दुखलै गोरबा फेरूँ नजरिया
दुख दुखीयाकेँ हरै परमेश्वरी तूँ
माइ हमरे बेरिया मुनलअ किबरिया
दिन छये देने छलौं दर्शन अपन जे
फेर दर्शन दिअ अहाँ हम छी भिखरिया
मोन टूटल जाइए छल देह टूटल
‘मनु’ तकै छै माइकेँ सगरो नगरिया
(बहरे रमल, मात्राक्रम 2122-2122-2122)
✍🏻 जगदानन्द झा ‘मनु’
अनलौं करेजा अपन ई स्वीकार करु
हमरासँ एना अहाँ नै बेपार करु
गरदनि उठा कनिक हमरा नहि देखबै
हम आब एतेक कोना सिंगार करु
सस्ता महग बाढ़ि रौदी सगरो भरल
सोइच गरीबक अहाँ किछु सरकार करु
हरलौं कते युगसँ तन मन धन बनि अपन
ऐ आतमा पर हमर नहि अधिकार करु
झूठक बटोरल अहाँकेँ बहुमत रहल
‘मनु’ नहि सड़ल बाँटि जनता बेमार करु
(बहरे सगीर, मात्राक्रम - 2212-2122-2212)
✍🏻 जगदानन्द झा ‘मनु’
तारीमे कतए मद जे चाही जीबै लेल
माहुरमे कुन जीवन चाही जे चीखै लेल
बाँकी नै तारीएटा टूटल मनकेँ लेल
जीवनमे एकर बादो बड़ छै पीबै लेल
सिस्टममे फाटल छै मेघसँ धरती धरि कोढ़
एतै कतयसँ दरजी ई सिस्टम सीबै लेल
जीतब हारब सदिखन लगले छै जीवन संग
फेरसँ उठि कोशिश नमहर हेतै जीतै लेल
खेती मोनसँ करबै ‘मनु’ जीवनकेँ तैयार
कर्मक बीया सगरो बहुते अछि छीटै लेल
(बहरे विदेह, मात्राक्रम- 2222-2222-222-21 सभ पाँतिमे)
✍🏻 जगदानन्द झा ‘मनु’
हम बनब चाहै छलौं की कि बनि गेलौं
प्रेममे प्रियतम अहीँ केर सनि गेलौं
आश जे परिवारकेँ आब नहि रहलै
जेब खाली देख सब हीन जनि गेलै
सुधि रहल नै बोझ लदने अपन हमरा
प्रेम कनिको भेटते हम तँ कनि गेलौं
मोनकेँ भीतर घराड़ी बसल सदिखन
छल लिखल परदेशके देश मनि गेलौं
नेह अप्पन आब नै नेह टा रहलै
मोनमे बसि ‘मनु’ हमर साँस गनि गेलौं
(बहरे कलीब, मात्राक्रम - 2122-2122-1222 सभ पाँतिमे)
✍🏻 जगदानन्द झा ‘मनु’
